@Yousef SeraG
@Mohamed Reda
من رحم المعانــاة يــُولَد الإبـــداع

تخيل إنك تكتشف رقم مسجل باسمك وأنت مش عارفه، وبدل ما تقدر توقفه في ثواني من موبايلك، تلاقي نفسك مضطر تروح فرع شركة أنت أصلاً معندكش أي علاقة بيها، تقف في طابور وتستنى، عشان تثبت إن ده مش خطك، عبء حقيقي ومصدر قلق لناس كتير، على إجراء المفروض يكون أبسط من كده بكتير.

وده اللي حصل فعلاً من فترة قريبة، حالات متعددة لأرقام متسجلة بأسماء أشخاص دون علمهم، ومش ملكهم أساساً، والطريقة الوحيدة للاستعلام عنها كانت من خلال تطبيق (My NTRA) التطبيق الرسمي التابع لوزارة الاتصالات، لكن هنا ظهرت المشكلة الأكبر: بدل ما الاستعلام يخلص في دقائق، كان بيتحول لرحلة مرهقة تنتهي بيك في الفرع، عشان تحل مشكلة أنت أصلاً مالكش ذنب فيها.

وبعد ما تكرَّرت شكاوى المستخدمين وبقت نمط واضح مش حالات فردية، قررنا نتحرك بشكل تطوعي كمصممي منتجات وتجربة مستخدم، ونعيد تصميم التجربة زي ما المفروض تكون.

تابعنا كلام الناس على متاجر التطبيقات ومنصات التواصل، وحلّلنا الشكاوى بندور على المشاكل المتكررة ورا كل تعليق، وطلع إن جوهر المشكلة أعمق من الشكل.

الأرقام كانت بتظهر بشكل مموه، والأغرب إن نظام التحقق كان معتمد على إنك تملك الرقم عشان تتحقق منه، وده بالظبط اللي بيعجز عنه أي حد اتسجل خط باسمه دون علمه.

فقلبنا المعادلة، بنينا التحقق على الهوية بدل الامتلاك (رقم قومي، وتصوير للبطاقة، وصورة معاها) بنفس مستوى التحقق المعتمد في الفروع، بس من مكانك وموبايلك.

الرقم بقى يظهر كامل أمام صاحبه، ومعاه إجراء مباشر يوقف الخط أو ينكر ملكيته في نفس اللحظة (وإنكار الملكية هنا مهم عشان تثبت إنك مالكش أي صلة بالخط ده، لو حصل واستُخدم في أي أعمال مخالفة للقانون)، واللي كان بياخد يوم وطابور بقى تقدر تخلصه في دقائق.

وما وقفناش لحد هنا، كان فيه تحسينات كتير من جميع الجوانب، وعشان تشوف التجربة كاملة هنسيبكم دلوقتي مع الكيس استادي المفصّلة، بتحكي الرحلة كاملة من أول خطوة لآخر خطوة.

اللينك: https://www.behance.net/gallery/254913187/Redesign-My-NTRA-app-Egypts-Telecom-Services-Gateway وأتمنى تستمتعوا بيها..🤍👇🏻

يومكم لذيذ، ودمتم بخير..🤍✨